Кафи́сма тре́тяя

Псало́м 17

В коне́ц, отро́ка Госпо́дня Дави́да,
я́же глагола́ Господе́ві словеса́ пíсні сея́ в день,
во́ньже ізба́ви єго́ із рук всіх вра́гов єго́
і із руки́ Сау́ля, і рече́:

² Возлюблю́ Тя, Го́споди, крíпости моя́.

³ Госпо́дь – утвержде́ніє моє́, і прибíжище моє́, і ізбави́тель мой. Бог мой, помо́щник мой, і упова́ю Нань. Защити́тель мой, і рог спасе́нія моє́го, і засту́пник мой.

⁴ Хваля́, призову́ Го́спода і от враго́в мої́х спасу́ся.

⁵ Одержа́ша м’я бо́лізні сме́ртния, і пото́ци беззако́нія см’ято́ша м’я.

⁶ Бо́лізні а́дови обийдо́ша м’я, предвари́ша м’я сíті сме́ртния.

⁷ І внегда́ скорбíти ми, призва́х Го́спода і ко Бо́гу моє́му возва́х. Усли́ша от Це́ркве святи́я Своє́я глас мой, і вопль мой пред Ним вни́йдет во у́ші Єго́.

⁸ І подвиже́ся, і трепе́тна бисть земля́, і основа́нія гор см’ято́шася і подвиго́шася, я́ко прогніва́ся на́ ня Бог.

⁹ Взи́де дим гнíвом Єго́ і огнь от лица́ Єго́ воспла́нется, у́глія возгорíшася от Не́го.

¹⁰ І приклони́ небеса́, і сни́де, і примра́к под нога́ма Єго́.

¹¹ І взи́де на Херуви́м, і летí, возлетí на кри́лу вíтреню.

¹² І положи́ тму за кров Свой, о́крест Єго́ селе́ніє Єго́, те́мна вода́ во о́блаціх возду́шних.

¹³ От облиста́нія пред Ним о́блаци пройдо́ша, град і у́гліє о́гнено.

¹⁴ І возгримí с небесе́ Госпо́дь, і Ви́шній даде́ глас Свой.

¹⁵ Пусти́ стрíли – і разгна́ я. І мо́лнія умно́жи – і см’яте́ їх.

¹⁶ І яви́шася істо́чници во́днії, і откри́шася основа́нія вселе́нния от запріще́нія Твоє́го, Го́споди, от дхнове́нія ду́ха гнíва Твоє́го.

¹⁷ Посла́ с ви́ше і прия́ть м’я, восприя́ть м’я от вод мно́гих.

¹⁸ Ізба́вит м’я от враго́в мої́х си́лних і от ненавидя́щих м’я, я́ко укріпи́шася па́че мене́.

¹⁹ Предвари́ша м’я в день озлобле́нія моє́го, і бисть Госпо́дь утвержде́ніє моє́.

²⁰ І ізведе́ м’я на широту́, ізба́вит м’я, я́ко восхотí м’я.

²¹ І возда́сть ми Госпо́дь по пра́вді моє́й і по чистотí ру́ку моє́ю возда́сть ми.

²² Я́ко сохрани́х пу́ті Госпо́дня і не нечествова́х от Бо́га моє́го.

²³ Я́ко вся судби́ Єго́ пре́до мно́ю, і оправда́нія Єго́ не отступи́ша от мене́.

²⁴ І бу́ду непоро́чен с Ним, і сохраню́ся от беззако́нія моє́го.

²⁵ І возда́сть ми Госпо́дь по пра́вді моє́й і по чистотí ру́ку моє́ю пред очи́ма Єго́.

²⁶ Со преподо́бним преподо́бен бу́деши, і со му́жем непови́нним – непови́нен бу́деши,

²⁷ і с ізбра́нним – ізбра́н бу́деши, і со стропти́вим – разврати́шися.

²⁸ Я́ко Ти лю́ди смире́нния спасе́ши і о́чі го́рдих смири́ши.

²⁹ Я́ко Ти просвіща́єши світи́льник мой, Го́споди, Бо́же мой, просвіща́єши тму мою́!

³⁰ Я́ко Тобо́ю ізба́влюся от іскуше́нія і о Бо́зі моє́м прелíзу стíну.

³¹ Бог мой – непоро́чен путь Єго́, словеса́ Госпо́дня раждеже́на, защити́тель єст всім упова́ющим Нань.

³² Я́ко кто бог, ра́зві Го́спода? Іли́ кто бог, кро́мі Бо́га на́шего?

³³ Бог препояса́яй м’я си́лою і положи́ непоро́чен путь мой.

³⁴ Соверша́яй но́зі мої́, я́ко єле́ні, і на висо́ких поставля́яй м’я.

³⁵ Науча́яй ру́ці мої́ на брань, і положи́л єси́ лук мíдян ми́шця моя́.

³⁶ І дал ми єси́ защище́ніє спасе́нія, і десни́ца Твоя́ прия́ть м’я, і наказа́ніє Твоє́ іспра́вит м’я в коне́ц, і наказа́ніє Твоє́ – то м’я нау́чит.

³⁷ Ушири́л єси́ стопи́ моя́ по́до мно́ю, і не ізнемо́жесті пле́сні мої́.

³⁸ Пожену́ враги́ моя́, і пости́гну я, і не возвращу́ся, до́ндеже сконча́ются.

³⁹ Оскорблю́ їх, і не возмогу́т ста́ти, паду́т под нога́ма мої́ма.

⁴⁰ І препояса́л м’я єси́ си́лою на брань, сп’ял єси́ вся воста́ющия на́ м’я под м’я.

⁴¹ І враг мої́х дал ми єси́ хребе́т, і ненавидя́щия м’я потреби́л єси́.

⁴² Возва́ша, і не бі спаса́яй, ко Го́споду – і не услиша́ше їх.

⁴³ І істню́ їх, я́ко прах пред лице́м вíтру, я́ко бре́ніє пу́ті погла́жду їх.

⁴⁴ Ізба́виши м’я от преріка́нія людíй, поста́виши м’я во главу́ язи́ком. Лю́діє, ї́хже не вíдях, поработа́ша ми.

⁴⁵ Во слух у́ха усли́шаша м’я, сино́ве чу́ждії солга́ша ми.

⁴⁶ Сино́ве чуждíї обетша́ша і охромо́ша от стезь свої́х.

⁴⁷ Жив Госпо́дь і благослове́н Бог. І да вознесе́тся Бог спасе́нія моє́го!

⁴⁸ Бо́же, да́яй отмще́ніє мні і повину́яй лю́ди под м’я,

⁴⁹ ізбави́телю мой от враг мої́х гнівли́вих, от воста́ющих на́ м’я вознесе́ши м’я, от му́жа непра́ведна ізба́виши м’я.

⁵⁰ Сего́ ра́ди ісповíмся Тебí во язи́цех, Го́споди, і íмені Твоє́му пою́,

⁵¹ велича́я спасе́нія царе́ва і творя́ ми́лость христу́ Своє́му Дави́ду і сíмені єго́ до вíка.

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Псало́м 18

Псало́м Дави́дов. В коне́ц

² Небеса́ повіда́ют сла́ву Бо́жію, творе́ніє же ру́ку Єго́ возвіща́єт твердь.

³ День дне́ві отрига́єт глаго́л, і нощ но́щі возвіща́єт ра́зум.

⁴ Ні сут рíчи, ні словеса́, ї́хже не сли́шатся гла́си їх.

⁵ Во всю зе́млю ізи́йде віща́ніє їх, і в конця́ вселе́нния глаголи́ їх. В со́лнці 1 положи́ селе́ніє Своє́,

⁶ і той, я́ко жени́х, ісходя́й от черто́га своє́го, возра́дуєтся, я́ко ісполи́н тещи́ путь.

⁷ От нача́тка небе́с ісхо́д єго́, і стріте́ніє єго́ до конца́ небе́с, і ність, íже укри́єтся теплоти́ єго́.

⁸ За́кон Госпо́день непоро́чен – обраща́яй душа́. Свіди́телство Госпо́днє вíрно – умудря́ющеє младе́нця.

⁹ Оправда́нія Госпо́дня пра́ва – веселя́щая се́рдце. За́повідь Госпо́дня свíтла – просвіща́ющая о́чі.

¹⁰ Страх Госпо́день чист – пребива́яй во вік вíка. Судби́ Госпо́дня íстинни – оправда́ни вку́пі,

¹¹ вожделíнни па́че зла́та і ка́мене че́стна мно́га і сла́ждша па́че ме́да і со́та.

¹² І́бо раб Твой храни́т я, внегда́ сохрани́ти я – воздая́ніє мно́гоє.

¹³ Гріхопаде́нія кто разумíєт? От та́йних мої́х очисти́ м’я

¹⁴ і от чу́ждих пощади́ раба́ Твоє́го, а́ще ми не одолíют. Тогда́ непоро́чен бу́ду і очищу́ся от гріха́ вели́ка.

¹⁵ І бу́дут во благоволе́нії словеса́ уст мої́х, і поуче́ніє се́рдца моє́го пред Тобо́ю ви́ну, Го́споди, Помо́щниче мой і Ізбави́телю мой!

Псало́м 19

В коне́ц, псало́м Дави́дов

² Усли́ши тя Госпо́дь в день печа́ли, защи́ти тя ім’я́ Бо́га Іа́ковля.

³ Посли́ ти по́мощ от свята́го, і от Сіо́на заступи́ тя.

⁴ Пом’яни́ вся́ку же́ртву твою́, всесожже́нія твоя́ ту́чна бу́ди.

⁵ Дажд ти Госпо́дь по се́рдцу твоє́му і весь совíт твой іспо́лни.

⁶ Возра́дуємся о спасе́нії Твоє́м і во ім’я́ Го́спода Бо́га на́шего возвели́чимся. Іспо́лни Госпо́дь вся проше́нія твоя́.

⁷ Ни́ні позна́х, я́ко спасл єст Госпо́дь христа́ Своє́го, усли́шит єго́ с небесе́ свята́го Своє́го, в сила́х спасе́ніє десни́ця Єго́.

⁸ Сíї на колесни́цах, і сíї на ко́нех, ми же во ім’я́ Го́спода Бо́га на́шего призове́м.

⁹ Тíї сп’я́ти би́ша і падо́ша, ми же воста́хом і ісправи́хомся!

¹⁰ Го́споди, спаси́ царя́ і усли́ши ни, во́ньже а́ще день призове́м Тя!

Псало́м 20

Псало́м Дави́дов

² Го́споди, си́лою Твоє́ю возвесели́тся цар і о спасе́нії Твоє́м возра́дуєтся зíло.

³ Жела́ніє се́рдца єго́ дал єси́ єму́ і хотíнія устну́ єго́ нíси лиши́л єго́.

⁴ Я́ко предвари́л єси́ єго́ благослове́нієм благости́нним, положи́л єси́ на гла́ві єго́ віне́ц от ка́мене че́стна.

⁵ Живота́ проси́л єст от Тебе́, і дал єси́ єму́ долготу́ дній во вік вíка.

⁶ Ве́лія сла́ва єго́ во спасе́нії Твоє́м, сла́ву і велелíпіє возложи́ши нань.

⁷ Я́ко даси́ єму́ благослове́ніє во вік вíка, возвесели́ши єго́ ра́достію с лице́м Твої́м.

⁸ Я́ко цар упова́єт на Го́спода і ми́лостію Ви́шняго не подви́жется.

⁹ Обря́щися рука́ Твоя́ всім враго́м Твої́м, десни́ца Твоя́ обря́щи вся ненавидя́щия Тебе́.

¹⁰ Я́ко положи́ши їх, я́ко пещ о́гнену, во вре́м’я лица́ Твоє́го. Госпо́дь гнíвом Свої́м см’яте́т я, і сність їх огнь.

¹¹ Плод їх от земля́ погуби́ши, і сíм’я їх – от сино́в человíческих.

¹² Я́ко уклони́ша на́ Тя зла́я, поми́слиша совíти, ї́хже не возмого́ша соста́вити.

¹³ Я́ко положи́ши я хребе́т во ізби́тціх Твої́х, уготова́єши лице́ їх.

¹⁴ Вознеси́ся, Го́споди, си́лою Твоє́ю, воспоє́м і поє́м си́ли Твоя́.

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Псало́м 21

В коне́ц, о заступле́нії у́тренем, псало́м Дави́дов

² Бо́же, Бо́же мой, во́ньми ми, воску́ю оста́вил м’я єси́? Дале́че от спасе́нія моє́го словеса́ гріхопаде́ній мої́х.

³ Бо́же мой, воззову́ во дні, – і не усли́шиши, і в но́щі – і не во безу́міє мні.

⁴ Ти же во свято́м живе́ши, хва́ло Ізра́їлева.

⁵ На́ Тя упова́ша отци́ на́ші. Упова́ша, – і ізба́вил єси́ їх.

⁶ К Тебí возва́ша – і спасо́шася, на́ Тя упова́ша – і не постидíшася.

⁷ Аз же – єсм черв, а не члове́к, поноше́ніє члове́ком і уничиже́ніє люде́м.

⁸ Всі, видя́щії м’я, поруга́ша ми ся, глагола́ша устна́ми, покива́ша гла́вою:

⁹ «Упова́ на Го́спода, – да ізба́вит ї, да спасе́т єго́, – я́ко хо́щет єго́!»

¹⁰ Я́ко Ти єси́ істо́ргий м’я із чре́ва, упова́ніє моє́ от со́сцу ма́тере моє́я.

¹¹ К Тебí приверже́н єсм от ложе́сн, от чре́ва ма́тере моє́я – Бог мой єси́ Ти.

¹² Не отступи́ от мене́, я́ко скорб близь, я́ко ність помога́яй ми.

¹³ Обийдо́ша м’я те́лци мно́зі, ю́нци ту́чнії одержа́ша м’я.

¹⁴ Отверзо́ша на́ м’я уста́ своя́, я́ко лев, восхища́яй і рика́яй.

¹⁵ Я́ко вода́ ізлія́ся, і разсипа́шася вся ко́сті моя́, бисть се́рдце моє́, я́ко воск, та́яй посре́ді чре́ва моє́го.

¹⁶ Ісше́, я́ко ску́дель, крíпость моя́, і язи́к мой прильпе́ горта́ні моє́му, і в персть сме́рти свел м’я єси́.

¹⁷ Я́ко обидо́ша м’я пси мно́зі, сонм лука́вих одержа́ша м’я, іскопа́ша ру́ці мої́ і но́зі мої́.

¹⁸ Ізчето́ша вся ко́сті моя́, тíї же смотрíша і презрíша м’я.

¹⁹ Разділи́ша ри́зи моя́ себí, і о оде́жді моє́й мета́ша жре́бія.

²⁰ Ти же, Го́споди, не удали́ по́мощі Твоє́я от мене́, на заступле́ніє моє́ во́ньми.

²¹ Ізми́ от ору́жія ду́шу мою́, і із руки́ пе́сія єдиноро́дную мою́.

²² Спаси́ м’я от уст лвов, і от рог єдиноро́жд смире́ніє моє́.

²³ Повíм ім’я́ Твоє́ бра́тії моє́й, посре́ді Це́ркве воспою́ Тя!

²⁴ Боя́щіїся Го́спода, восхвалíте Єго́. Все сíм’я Іа́ковле, прославíте Єго́. Да убої́т же ся от Не́го все сíм’я Ізра́їлево.

²⁵ Я́ко не уничижи́, ні негодова́ моли́тви ни́щаго, ні отврати́ лице́ Своє́го от мене́, і єгда́ воззва́х к Не́му, услиша́ м’я.

²⁶ О Тебí похва́ла моя́, во Це́ркві вели́ці ісповíмся Тебí, моли́тви моя́ возда́м пред боя́щимися Єго́.

²⁷ Ядя́т ни́щії і наситя́тся, і восхва́лят Го́спода взиска́ющії Єго́, – жи́ва бу́дут се́рдца їх во вік вíка.

²⁸ Пом’яну́тся і обратя́тся ко Го́споду всі ко́нци земля́, і поклоня́тся пред Ним вся оте́чествія язи́ков,

²⁹ я́ко Госпо́днє єст Ца́рствіє, і Той облада́єт язи́ки.

³⁰ Ядо́ша і поклони́шася всі ту́чнії земля́. Пред Ним припа́дут всі, низходя́щії в зе́млю, і душа́ моя́ Тому́ живе́т!

³¹ І сíм’я моє́ поработа́єт Єму́, возвісти́тся Господе́ві род гряду́щий.

³² І возвістя́т пра́вду Єго́ люде́м роди́мим, ї́хже сотвори́ Госпо́дь.

Псало́м 22

Псало́м Дави́дов

¹ Госпо́дь пасе́т м’я, і нічто́же м’я ли́шит.

² На мíсті зла́чні, та́мо м’я всели́, на водí поко́йні воспита́ м’я.

³ Ду́шу мою́ обрати́, наста́ви м’я на стезя́ пра́вди íмени ра́ди Єго́.

⁴ А́ще бо і по́йду посре́ді сíні сме́ртния, не убою́ся зла, я́ко Ти со мно́ю єси́, жезл Твой і па́лица Твоя́, та м’я утіши́ста.

⁵ Уготова́л єси́ пре́до мно́ю тра́пезу сопроти́в стужа́ющим ми, умасти́л єси́ єле́ом главу́ мою́, і ча́ша Твоя́ упоя́ющая м’я, я́ко держа́вна.

⁶ І ми́лость Твоя́ пожене́т м’я вся дні живота́ моє́го, і всели́ти ми ся в дом Госпо́день в долготу́ дній.

Псало́м 23

Псало́м Дави́дов, во єдину́ от субо́т

¹ Госпо́дня єст земля́ і ісполне́ніє єя́, вселе́нная і всі, живу́щії на ней.

² Той на мо́рях основа́л ю єст і на ріка́х уготова́л ю єст.

³ Кто взи́йдет на гору́ Госпо́дню? Іли́ кто ста́нет на мíсті свято́м Єго́?

⁴ Непови́нний рука́ма і чи́стий се́рдцем, íже не прия́т  на су́є душа́ своє́я, і не кля́тся ле́стію íскренему своє́му.

⁵ Сей при́ймет благослове́ніє от Го́спода і ми́лостиню от Бо́га, Спа́са своє́го.

⁶ Сей род íщущих Го́спода, íщущих лица́ Бо́га Іа́ковля.

⁷ Возмíте, вра́та, кня́зі ва́ша, і возмíтеся, вра́та вíчная, і вни́дет Цар сла́ви.

⁸ Кто єст сей Цар сла́ви? Госпо́дь крíпок і си́лен, Госпо́дь си́лен в бра́ні.

⁹ Возмíте, вра́та, кня́зі ва́ша, і возмíтеся, вра́та вíчная, – і вни́дет Цар сла́ви.

¹⁰ Кто єст сей Цар сла́ви? Госпо́дь си́лам, – Той єст Цар сла́ви.

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

По тре́тієй кафи́смі

Трисвято́є і по О́тче наш. Тропарí покая́нні:

Смире́нную мою́ ду́шу во грісе́х жи́тіє все іжди́вшую посіти́, Го́споди, і, я́ко блу́дницу, прийми́ і спаси́ м’я.

Сла́ва Отцу́, і Си́ну, і Свято́му Ду́ху.

Ослабле́н єсм сном уни́нія і помрача́юся лíностію гріхо́вною, но восія́й світ покая́нія і просвіти́ ми зрак ми́сленний, Просвіти́телю душ на́ших, Хри́сте Бо́же.

І ни́ні, і при́сно, і во вíки віко́м. Амíнь.

Сло́во О́тчеє, Христа́ Бо́га на́шего іс Тебе́ вопло́щшеєся разумíхом, Богоро́дице Дíво, Того́ моли́ спасти́ ду́ші на́ша.

Го́споди, поми́луй (четирдеся́т).

Моли́тва тре́тяя

Присносія́тельноє і Пресвíтлоє Пра́вди Со́лнце, Хри́сте Бо́же наш! Пло́тію восія́вий во тмі невидíнія на́шего і ко зрíнію непристу́пния Ти сла́ви вся призва́вий! Іспали́ огне́м Твоє́го непостижи́маго Божества́ вся́ку во мні неісто́вния ве́щі зло́бу, стрíли лука́ваго раждеже́нния погаси́, возсія́й в се́рдці моє́м Твоє́го Богоразу́мія Світ і отверзи́ о́чі мої́ ко Єва́нгелских Ти про́повідей разумíнію і ко позна́нію чуде́с Твої́х. Всади́ в м’я і блаже́ннних Твої́х за́повідей страх, да вся пло́тьскія по́хоті попра́вши, в духо́вном жи́тії поживу́, вся ко Твоє́му благоуго́дію і смиренномудрству́ющи, і творя́щи. Я́ко Благослове́н єси́ во вíки віко́в. Амíнь.