Кафи́сма дев’я́тая

Псало́м 64

В коне́ц, псало́м пíсні Дави́дові,
пíснь Ієремíєва і Ієзекíїлева,
людíй прише́лствія, єгда́ хотя́ху ісходи́ти

² Тебí подоба́єт пíснь, Бо́же, в Сіо́ні, і Тебí возда́стся моли́тва в Ієрусали́мі.

³ Усли́ши моли́тву мою́, к Тебí вся́ка пло́ть при́йдет.

⁴ Словеса́ беззако́нник премого́ша нас, і нече́стія на́ша Ти очи́стиши.

⁵ Блаже́н, єго́же ізбра́л і прия́л єси́, всели́тся во дво́ріх Твої́х. Іспо́лнимся во благи́х до́му Твоє́го, свята́ Це́ркви Твоя́,

⁶ ди́вна во пра́вді. Усли́ши ни, Бо́же, Спаси́телю наш, упова́ніє всім ко́нцем землí і су́щим в мо́рі дале́че.

⁷ Готова́яй го́ри крíпостію Своє́ю, препоя́сан си́лою,

⁸ смуща́яй глубини́ мо́рскія, шу́му волн Єго́ кто посто́їт? См’яту́тся язи́ци

⁹ і убоя́тся живу́щії в ко́нцех от зна́меній Твої́х, ісхо́ди у́тру і ве́черу украси́ши.

¹⁰ Посіти́л єси́ зе́млю і упої́л єси́ ю, умножи́л єси́ обогати́ти ю. Ріка́ Бо́жія наполни́ся вод. Уготова́л єси́ пи́щу їм, я́ко та́ко єст уготова́ніє.

¹¹ Бра́зди єя́ упо́й, умно́жи жи́та єя́, в ка́плях єя́ возвесели́тся возсія́ющи.

¹² Благослови́ши віне́ц лíту бла́гости Твоє́я, і по́ля Твоя́ наси́тятся ту́ка.

¹³ Разботíют кра́сная пусти́ні, і ра́достію хо́лми препоя́шутся.

¹⁴ Одія́шася о́вни о́вчії, і удо́лія умно́жат пшени́цу. Воззову́т, íбо воспою́т.

Псало́м 65

В коне́ц, піснь псалма́ воскресе́нія

² Воспо́йте Господе́ві, вся земля́, по́йте же íмені Єго́, дадíте сла́ву хва́лі Єго́!

³ Рцíте Бо́гу: «Коль стра́шна дíла Твоя́, во мно́жестві си́ли Твоє́я солгу́т Тебí вра́зі Твої́.

⁴ Вся земля́ да покло́нит Ти ся і поє́т Тебí, да поє́т же íмені Твоє́му, Ви́шній!»

⁵ Прийдíте і ви́діте дíла Бо́жія, коль стра́шен во совíтех па́че сино́в члове́ческих.

⁶ Обраща́яй мо́ре в су́шу, в ріцí про́йдут нога́ми, та́мо возвесели́мся о Нем!

⁷ Облада́ющом си́лою Своє́ю вíку; о́ці Єго́ на язи́ки призира́єті: прогніва́ющії да не возно́сятся в себí.

⁸ Благословíте, язи́ци, Бо́га на́шего, і сли́шан сотворíте глас хва́ли Єго́.

⁹ Поло́жшаго ду́шу мою́ в живо́т, і не да́вшаго во см’яте́ніє ног мої́х.

¹⁰ Я́ко іскуси́л ни єси́, Бо́же, ражде́гл єси́ нас, я́коже раждиза́єтся сре́бро.

¹¹ Вове́л ни єси́ в сіть, положи́л єси́ ско́рбі на хребтí на́шем.

¹² Возве́л єси́ члове́ки на гла́ви на́ша, пройдо́хом скво́зі огнь і во́ду, і ізве́л єси́ нас в поко́й.

¹³ Вни́ду в дом Твой со всесожже́нієм, возда́м Тебí моли́тви моя́,

¹⁴ я́же ізреко́сті устнí мої́ і глагола́ша уста́ моя́ в печа́лі моє́й.

¹⁵ Всесожже́нія ту́чна вознесу́ Тебí с кади́лом і о́вни, возда́м Тебí воли́ с ко́зли.

¹⁶ Прийдíте, усли́шіте, і повíм вам, всі боя́щіїся Бо́га, єли́ка сотвори́ душí моє́й.

¹⁷ К Не́му усти́ мої́ми возва́х і вознесо́х под язи́ком мої́м.

¹⁸ Непра́вду а́ще возрíх в се́рдці моє́м, да не усли́шит мене́ Госпо́дь.

¹⁹ Сего́ ра́ди усли́ша м’я Бог, внят гла́су моле́нія моє́го.

²⁰ Благослове́н Бог, íже не отста́ви моли́тви моє́я і ми́лости Своє́я от мене́!

Псало́м 66

В коне́ц, в пíніїх, псало́м пíсні Дави́дові

² Бо́же, ущедри́ ни і благослови́ ни, просвіти́ лице́ Твоє́ на́ ни, і поми́луй ни.

³ Позна́ти на землí путь Твой, во всіх язи́ціх — спасе́ніє Твоє́.

⁴ Да ісповідя́тся Тебí лю́діє, Бо́же, да ісповідя́тся Тебí лю́діє всі.

⁵ Да возвеселя́тся і возра́дуются язи́ци, я́ко суди́ши люде́м правото́ю, і язи́ки на землí наста́виши.

⁶ Да ісповідя́тся Тебí лю́діє, Бо́же, да ісповідя́тся Тебí лю́діє всі.

⁷ Земля́ даде́ плод свой. Благослови́ ни, Бо́же, Бо́же наш.

⁸ Благослови́ ни, Бо́же, і да убоя́тся Єго́ всі ко́нци земля́!

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Псало́м 67

В коне́ц пíсні псало́м Дави́дові

² Да воскре́снет Бог, і рази́йдутся вра́зі Єго́ і да біжа́т от лица́ Єго́ ненавидя́щії Єго́!

³ Я́ко іщеза́єт дим, да іще́знут, я́ко та́єт воск от лица́ огня́, та́ко да поги́бнут грíшници от лица́ Бо́жія.

⁴ А пра́ведници да возвеселя́тся, да возра́дуются пред Бо́гом, насладя́тся во весе́лії.

⁵ Воспо́йте Бо́гу, по́йте íмені Єго́, путь сотворíте возше́дшому на за́пади. Госпо́дь ім’я́ Єму́, і ра́дуйтеся пред Ним.

⁶ Да см’яту́тся от лица́ Єго́, Отца́ си́рих і Судії́ вдови́ць, — Бог в мíсті свято́м Своє́м.

⁷ Бог вселя́єт єдиноми́сльния в дому́, ізводя́й окова́нния в му́жестві, та́кожде прогніва́ющия, живу́щия во гро́біх.

⁸ Бо́же, єгда́ ісхожда́л єси́ пред людьми́ Свої́ми, єгда́ мимохожда́л єси́ в пусти́ні,

⁹ земля́ потрясе́ся, íбо небеса́ ка́нуша от лица́ Бо́га Сина́йна, от лица́ Бо́га Ізра́їлева.

¹⁰ Дожд во́лен отлучи́ши, Бо́же, достоя́нію Твоє́му, і ізнемо́же, Ти же соверши́л єси́ є.

¹¹ Живо́тная Твоя́ живу́т на ней, уготова́л єси́ во бла́гости Твоє́й ни́щому, Бо́же.

¹² Госпо́дь дасть глаго́л благовіству́ющим си́лою мно́гою.

¹³ Цар сил возлюбле́ннаго, ліпото́ю до́му разділи́ти кори́сть.

¹⁴ А́ще поспите́ посре́ді предíл, кри́лі голуби́ні посребре́ні, і междора́мія єя́ во блеща́нії зла́та.

¹⁵ Єгда́ разньстви́т Небе́сний царя́ на ней, осніжа́тся в Селмо́ні.

¹⁶ Гора́ Бо́жія, гора́ ту́чная, гора́ уси́реная, гора́ ту́чная.

¹⁷ Воску́ю непщу́єте, го́ри усире́ния? Гора́, ю́же благоволи́ Бог жи́ти в ней, íбо Госпо́дь всели́тся до конца́.

¹⁸ Колесни́ца Бо́жія тма́ми тем, ти́сяща гобзу́ющих, Госпо́дь во них в Синаї́ні во свято́м.

¹⁹ Возше́л єси́ на висоту́, пліни́л єси́ плінь, прия́л єси́ дая́ніє в члове́ціх, íбо непокаря́ющияся, є́же всели́тися.

²⁰ Госпо́дь Бог благослове́н, благослове́н Госпо́дь день дне, поспíшит нам Бог спасе́ній на́ших.

²¹ Бог наш, Бог є́же спаса́ти, і Госпо́дня, Госпо́дня ісхо́дища сме́ртная.

²² Оба́че Бог сокру́шит гла́ви враго́в Свої́х, верх влас преходя́щих во прегріше́ніїх свої́х.

²³ Рече́ Госпо́дь: «От Васа́на обращу́, обращу́ во глубина́х мо́рских,

²⁴ я́ко да омо́чится нога́ твоя́ во кро́ві, язи́к пес твої́х, от враг от Не́го».

²⁵ Ви́діна би́ша ше́ствія Твоя́, Бо́же, ше́ствія Бо́га, моє́го Царя́, íже во свято́м.

²⁶ Предвари́ша кня́зі близ пою́щих, посре́ді дів тимпа́нниц.

²⁷ Во церква́х благословíте Бо́га — Го́спода от істо́чник Ізра́їлевих!

²⁸ Та́мо Веніами́н юно́ша в ужа́сі, кня́зі Іу́дові — влади́ки їх, кня́зі Завуло́ні, кня́зі Нефали́млі.

²⁹ Заповíжд, Бо́же, си́лі Твоє́й, укріпи́, Бо́же, се, є́же соділа́л єси́ в нас.

³⁰ От Це́ркве Твоє́я в Ієрусали́м Тебí принесу́т ца́ріє да́ри.

³¹ Запріти́ звíрем тро́стним, сонм ю́нец в ю́ницах лю́дских, є́же затвори́ти іскуше́нния сре́бром: раздруши́ язи́ки хотя́щия бра́нем.

³² При́йдут молитве́ници от Єги́пта, Ефіо́пія предвари́т ру́ку свою́ Бо́гу.

³³ Ца́рствія зе́мная, по́йте Бо́гу, воспо́йте Господе́ві,

³⁴ возше́дшому на не́бо небе́сноє на восто́ки. Се дасть гла́су Своє́му глас си́ли.

³⁵ Дадíте сла́ву Бо́гові, на Ізра́їлі велелíпота Єго́, і си́ла Єго́ на о́блаціх.

³⁶ Ди́вен Бог во святи́х Свої́х, Бог Ізра́їлев; Той дасть си́лу і держа́ву люде́м Свої́м. Благослове́ний Бог!

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Псало́м 68

В коне́ц о ізмíншихся.
Псало́м Дави́дові

² Спаси́ м’я, Бо́же, я́ко внидо́ша во́ди до душа́ моє́я.

³ Углебо́х в тимíнія глубини́, і ність постоя́нія, прийдо́х во глубини́ мо́рскія, і бу́ря потопи́ м’я.

⁴ Утруди́хся, зовя́, ізмо́лче горта́нь мой, ісчезо́сті о́ці мої́ упова́ющу ми на Бо́га моє́го.

⁵ Умно́жишася па́че вла́сов гла́ви моє́я ненавидя́щії м’я всу́є, укріпи́шася вра́зі мої́, ізгоня́щії м’я без пра́вди, я́же не восхища́х, тогда́ воздая́х.

⁶ Бо́же, Ти увидíл єси́ безу́міє моє́, і прегріше́нія моя́ от Тебе́ не утаї́шася.

⁷ Да не постидя́тся о мні терпя́щії Тебе́, Го́споди, Го́споди Сил. Нíже да посрамя́тся о мні íщущії Тебе́, Бо́же Ізра́їлев.

⁸ Я́ко Тебе́ ра́ди прия́х поноше́ніє, покри́ срамота́ лице́ моє́.

⁹ Чужд бих бра́тії моє́й і стра́нен сино́м ма́тере моє́я,

¹⁰ я́ко ре́вность до́му Твоє́го сніде́ м’я, і поноше́нія понося́щих Ти нападо́ша на́ м’я.

¹¹ І покри́х по́стом ду́шу мою́, і бисть в поноше́ніє мні.

¹² І положи́х одія́ніє моє́ вре́тище — і бих їм в при́тчю.

¹³ О мні глумля́хуся сідя́щії во вра́тіх і о мні поя́ху пíющії вино́.

¹⁴ Аз же моли́твою моє́ю к Тебí, Бо́же, вре́м’я благоволе́нія. Бо́же, во мно́жестві ми́лости Твоє́я услиши́ м’я во íстині спасе́нія Твоє́го.

¹⁵ Спаси́ м’я от бре́нія, да не углебну́, ізба́ви м’я от ненавидя́щих м’я і от глубо́ких вод.

¹⁶ Да не пото́пит мене́ бу́ря во́дная, ні да пожре́т мене́ глубина́, нíже да сведе́т о мні рове́нник уст свої́х.

¹⁷ Усли́ши м’я, Го́споди, я́ко блага́ ми́лость Твоя́, по мно́жеству щедро́т Твої́х при́зри на́ м’я.

¹⁸ Не отврати́ лица́ Твоє́го от отро́ка Твоє́го, я́ко ско́рблю, ско́ро усли́ши м’я.

¹⁹ Во́ньми душí моє́й і ізба́ви ю, враго́в мої́х ра́ди ізба́ви м’я.

²⁰ Ти бо вíси поноше́ніє моє́, і студ мой, і срамоту́ мою́. Пред Тобо́ю сут всі стужа́ющії ми.

²¹ Поноше́нія чая́ше душа́ моя́ і стра́сти, і ждах соскорб’я́щаго — і не бі, і утіша́ющих — і не обріто́х.

²² І да́ша во снідь мою́ желч, і в жа́жду мою́ напої́ша м’я о́цта.

²³ Да бу́дет тра́пеза їх пред ни́ми в сіть і в воздая́ніє і в собла́знь.

²⁴ Да помрачи́тіся о́чі їх не ви́діти, і хребе́т їх отню́д сляци́.

²⁵ Проли́й на́ ня гнів Твой, і я́рость гнíва Твоє́го да пости́гнет їх.

²⁶ Да бу́дет двор їх пуст, і в жи́лищих їх да не бу́дет живу́щаго.

²⁷ Зане́ єго́ же Ти порази́л єси́, тíї погна́ша, і ко бо́лізні язв мої́х приложи́ша.

²⁸ Приложи́ беззако́ніє ко беззако́нію їх, і да не вни́йдут во пра́вду Твою́.

²⁹ Да потреб’я́тся от Книг Живо́тних, і со пра́ведними да не напи́шутся.

³⁰ Нищ і боля́ єсм аз; спасе́ніє Твоє́, Бо́же, прия́ть м’я.

³¹ Восхвалю́ ім’я́ Бо́га моє́го с пíснію, возвели́чю Єго́ во хвале́нії.

³² І уго́дно бу́дет Бо́гу па́че те́лца ю́на, ро́ги ізда́юща і па́знокти.

³³ Да узря́т ни́щії — і возвеселя́тся. Взищíте Бо́га — і жи́ва бу́дет душа́ ва́ша.

³⁴ Я́ко усли́ша ни́щия Госпо́дь і окова́нних Свої́х не уничижи́.

³⁵ Да восхва́лят Єго́ небеса́ і земля́, мо́ре і вся живу́щая в нем.

³⁶ Я́ко Бог спасе́т Сіо́на, і сози́ждутся гра́ди Іуде́йстії, і вселя́тся та́мо, і наслідя́т ї.

³⁷ І сíм’я рабо́в Твої́х удержи́т ї, і люб’я́щії ім’я́ Твоє́ вселя́тся в нем.

Псало́м 69

В коне́ц Дави́дові. Воспомина́ніє,
во є́же спасти́ м’я Го́споду

² Бо́же, в по́мощ мою́ вонми́, Го́споди, помощи́ ми потщи́ся.

³ Да постидя́тся і посрам’я́тся íщущії душа́ моє́я, да возвратя́тся восп’я́т, і постидя́тся мисля́щії ми зла́я.

⁴ Да возвратя́тся а́біє стидя́щеся, глаголю́щії ми: «Бла́го же, бла́го же!»

⁵ Да возра́дуются і возвеселя́тся о Тебí всі íщущії Тебе́, Бо́же, і да глаголю́т ви́ну: «Да возвели́чится Госпо́дь», — люб’я́щії спасе́ніє Твоє́!

⁶ Аз же нищ єсм і убо́г: Бо́же, помози́ ми! Помо́щник мой і Ізбави́тель мой єси́ Ти, Го́споди, не закосни́!

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

Алилу́я, алилу́я, алилу́я, сла́ва Тебí, Бо́же (три́жди).

Го́споди, поми́луй (три́жди).

Сла́ва Отцу́, і Си́ну, і Свято́му Ду́ху, і ни́ні, і при́сно, і во вíки віко́м. Амíнь.

По дев’я́той кафи́смі

Трисвято́є і по О́тче наш. Тропарí покая́нні:

Дія́нія моя́ і помишле́нія, гріхи́ і хотíнія взиска́ти хо́щеши іспита́нієм Свої́м, дажд ми по́мощ на покая́ніє ко до́брому отвíту, Хри́сте Бо́же, я́ко Человіколю́бец.

Сла́ва Отцу́, і Си́ну, і Свято́му Ду́ху.

Очисти́вий Петро́во отве́рженіє слеза́ми і митарю́ гріхи́ воздиха́нієм прости́вий, і мене́ поми́луй, Человіколю́бче Го́споди.

І ни́ні, і при́сно, і во вíки віко́м. Амíнь.

Ра́дуйся, із Нея́же непрело́жно Сло́во плоть бисть і всели́ся в ни. Ра́дуйся, Пречи́стая, Апо́столом і Му́чеником Ра́досте і вíрним Спасе́ніє, Ма́ти Христа́ Бо́га!

Го́споди, поми́луй (четирдеся́т).

Моли́тва дев’я́тая

Благодарю́ Тя, Го́споди Бо́же спасе́нія моє́го, я́ко вся тво́риши во благодія́ніє жи́зні моє́я. Да ви́ну к Тебí взира́ю, Спа́су і Благодíтелю душí моє́я, я́ко сохрани́л м’я єси́ грíшнаго і недосто́йнаго в жи́зні сей, от рожде́нія моє́го і досе́лі. Тобо́ю бо, Человіколю́бче, живу́, дви́жуся і єсм, і Твої́м спаси́тельним Промишле́нієм і ни́ні дви́гнухся на похва́лу і поклоне́ніє Пресвята́го íмене Твоє́го. Тíмже мо́лю Ти ся, Го́споди: дажд ми благода́ть і си́лу, да сподоблю́ся пíти Тебí разу́мно і моли́тися непреста́нно, во стра́сі і тре́петі своє́ спасе́ніє дíлающи. Усли́ши, Влади́ко, і поми́луй м’я, і сокруши́ под но́ги моя́ неви́димия враги́ і супоста́ти моя́. Я́ко Ти єси́ єди́н Помо́щник животу́ моє́му, да Тя восхвалю́ і благословлю́, ни́ні і во вíки. Амíнь.